ஸ்டார்லிங்கைத் தடுக்கிறார்களா? எலான் மஸ்க்கின் குற்றச்சாட்டுக்கு மத்திய அரசு விளக்கம்!

இந்தியாவில் ஸ்டார்லிங்க் செயற்கைக்கோள் இணைய சேவையைத் தொடங்குவதில் தடைகள் இருப்பதாக ஸ்பேஸ்எக்ஸ் நிறுவனர் எலான் மஸ்க் எழுப்பிய குற்றச்சாட்டை மத்திய அரசு முற்றிலுமாக மறுத்துள்ளது. மேலும், நாட்டின் தொலைத்தொடர்பு ஒழுங்குமுறை விதிகள் அனைத்து நிறுவனங்களுக்கும் நியாயமான முறையில் பொதுவானவை என விளக்கமளிக்கப்பட்டுள்ளது.

இந்தியாவில் ஸ்டார்லிங்க் சேவை நுழைவதற்குச் சில ஏகபோகச் சக்திகள் மற்றும் பெரு நிறுவனங்கள் தடையாக இருப்பதாகவும், இது இந்திய மக்களுக்கு இழைக்கப்படும் அநீதி போலச் செயல்படுவதாகவும் எலான் மஸ்க் சமூக வலைதளத்தில் குற்றம்சாட்டியிருந்தார்.

எலான் மஸ்க்கின் இந்தக் குற்றச்சாட்டுகள் முற்றிலும் அடிப்படை ஆதாரமற்றவை மற்றும் தவறான புரிதலின் அடிப்படையில் எழுப்பப்பட்டவை என்று மத்திய அரசு திட்டவட்டமாகத் தெரிவித்துள்ளது.

ஸ்டார்லிங்க் உள்ளிட்ட மூன்று நிறுவனங்களுக்குத் தொலைத்தொடர்புத் துறையின் மூலம் GMPCS உரிமம் வழங்கப்பட்டுள்ளதாகவும், அனைத்து நிறுவனங்களுக்கும் நியாயமான மற்றும் பாகுபாடற்ற விதிகளே பின்பற்றப்படுவதாகவும் தெரிவிக்கப்பட்டுள்ளது.

செயற்கைக்கோள் தகவல் தொடர்பு சேவைகளுக்கான அரசாங்கத்தின் அங்கீகாரக் கட்டமைப்பு மிகவும் வெளிப்படையானது என்றும், உரிமம் பெற்றுள்ள அனைத்து நிறுவனங்களும் தற்போது பாதுகாப்பு மதிப்பீடுகள் மற்றும் சட்டப்பூர்வமான ஒரே கட்டத்தில்தான் உள்ளன என்றும் அரசு தரப்பில் விளக்கமளிக்கப்பட்டுள்ளது.