வரலாறு படைத்த பெண் கலைஞர் - ஒளிப்பதிவுக்காக ஆஸ்கர் வென்று புதிய சாதனை!
அமெரிக்காவின் லாஸ் ஏஞ்சலீஸ் நகரில் இன்று அதிகாலை நடைபெற்ற ஆஸ்கர் விருது வழங்கும் விழாவில் ஒரு மகத்தான உலக சாதனை நிகழ்த்தப்பட்டுள்ளது. இதுவரை ஆண்கள் மட்டுமே ஆதிக்கம் செலுத்தி வந்த சிறந்த ஒளிப்பதிவாளர் பிரிவில் ஆட்டம் டூரால்ட் அர்க்காபாவ் என்ற பெண் கலைஞர் முதன்முறையாக விருது வென்றுள்ளார். சின்னர்ஸ் என்ற திரைப்படத்தில் தனது அபாரமான கேமரா திறமையை வெளிப்படுத்தியதற்காக அவருக்கு இந்த உயரிய அங்கீகாரம் வழங்கப்பட்டுள்ளது. ஆஸ்கர் விருது வரலாற்றில் சுமார் நூறு ஆண்டுகளில் ஒளிப்பதிவுக்காக ஒரு பெண் விருது பெறுவது இதுவே முதல் முறையாகும். இந்த அறிவிப்பு வெளியானதும் அந்த அரங்கமே எழுந்து நின்று அவருக்குத் தங்களின் பலத்த கைதட்டல்கள் மூலம் தங்களின் வாழ்த்துகளைத் தெரிவித்தனர்.
ஹாலிவுட் திரையுலகில் கேமராவுக்குப் பின்னால் இருக்கும் தொழில்நுட்பப் பிரிவுகளில் பெண்களின் பங்களிப்பு குறைவாகவே இருப்பதாக ஒரு கருத்து நீண்ட காலமாக நிலவி வந்தது. தற்போது அர்க்காபாவ் படைத்துள்ள இந்தச் சாதனை எதிர்காலத்தில் பல பெண் கலைஞர்கள் இத்துறைக்கு வர ஒரு பெரிய ஊந்துதலாக அமையும். விருது பெற்ற தருணத்தில் மேடையில் பேசிய அவர் தனது கண்களில் நீர் மல்க மிகவும் உணர்ச்சிப்பூர்வமாகக் காணப்பட்டார். ஒரு பெண்ணாகத் தனது திறமை மீது முழு நம்பிக்கை வைத்து இந்தப் படத்தைக் கொடுத்த இயக்குநர் கூக்ளருக்கு அவர் மனமார்ந்த நன்றிகளைத் தெரிவித்துக் கொண்டார். இந்த வெற்றித் தருணம் திரையுலகில் ஒரு புதிய சரித்திரத் தொடக்கமாகப் பார்க்கப்படுகின்றது.
சிறந்த ஒளிப்பதிவுக்கான விருதுப் பட்டியலில் இத்தனை ஆண்டுகளாக ஆண்களின் பெயர்கள் மட்டுமே இடம்பெற்று வந்த நிலையை அர்க்காபாவ் தற்போது மாற்றி எழுதியுள்ளார். திரைப்படத்தின் ஒவ்வொரு காட்சியையும் உயிரோட்டத்துடன் படமாக்கிய அவரது உழைப்பிற்குத் தற்போது உலகளாவிய அங்கீகாரம் கிடைத்துள்ளது. சர்வதேசத் திரைப்படக் கலைஞர்கள் பலரும் சமூக வலைதளங்கள் வாயிலாக அவருக்குத் தங்களின் பாராட்டுக்களைத் தெரிவித்து வருகின்றனர். தொழில்நுட்பத் துறையில் பெண்களால் எதையும் சாதிக்க முடியும் என்பதை அவர் இந்த விருதின் மூலம் உலகிற்கு மெய்ப்பித்துக் காட்டியுள்ளார். ஹாலிவுட் வரலாற்றில் அழியாத இடத்தைப் பிடித்துள்ள இந்தச் சாதனை இன்று உலக அளவில் மிக முக்கியமான செய்தியாகப் பேசப்படுகின்றது.